Estonian Educational Excellence: from PISA to Pedagogy through Innovation: presentación do sistema educativo estonio

 

A partir dos materiais aportados e da información recollida na estadia formativa organizada polo CFR de Ferrol elaboramos a seguinte presentación:

Estonian_education de Maria del Camino

Estonian Educational Excellence: from PISA to Pedagogy through Innovation en Tallinn, Estonia

Análise do Sistema Educativo de Estonia

Este documento ofrece unha visión detallada do sistema educativo de Estonia, centrada na súa estrutura e características, así como nas leis que o regulan. A través da estadía realizada entre o 10 e o 17 de maio de 2025, obtivemos información valiosa sobre os factores que contribúen ao éxito educativo do alumnado estoniano, que se destaca por obter excelentes resultados a nivel europeo e mundial. A análise inclúe aspectos da educación básica, secundaria e as normativas que sustentan este sistema.

                                          Imaxe autoeditada da presentación da escola Tallinna XXI Kool e do sistema educativo de Estonia.

Educación Básica en Estonia

A educación básica en Estonia está baseada no principio da escola estandarizada e comprende os graos do 1.º ao 9.º. Este nivel de educación é obrigatorio e proporciona aos estudantes os coñecementos e competencias necesarios para continuar os seus estudos na educación secundaria superior. O currículo nacional establece os resultados esperados por etapa de estudo:

• Etapa I: graos 1–3

• Etapa II: graos 4–6

• Etapa III: graos 7–9

Os estudantes poden adquirir a educación básica en escolas básicas ou en escolas secundarias superiores que ofrezan graos básicos. A transición entre graos e escolas é fluída, permitindo que os estudantes se adapten facilmente ao seu entorno educativo.

Currículo Nacional

O Currículo Nacional de Estonia (2011, revisado en 2024) establece os seguintes aspectos fundamentais:

• Valores fundamentais da educación

• Obxectivos de ensino e aprendizaxe

• Enfoques da aprendizaxe

• Requisitos para a contorna de aprendizaxe

• Bases para a organización do ensino e a aprendizaxe

• Principios e requisitos de avaliación

O currículo busca fomentar a creatividade, a versatilidade e o desenvolvemento integral dos estudantes, preparándoos para a vida familiar, laboral e pública.

Valores e Socialización

As escolas básicas promoven valores fundamentais e axudan aos estudantes a comprender as consecuencias das súas accións. O currículo tamén apoia a socialización da nova xeración, baseándose nas tradicións culturais estonianas e nos valores comúns europeos.

Educación Secundaria Superior e Formación Profesional

A educación secundaria superior en Estonia divídese en educación secundaria xeral e educación secundaria vocacional. A educación secundaria xeral, adquirida nas escolas secundarias superiores, establece as condicións para acceder á educación superior. Por outra banda, a educación secundaria vocacional permite aos estudantes prepararse para o mercado laboral.

Estatísticas e Tendencias

Aproximadamente o 70 % dos graduados da educación básica continúan os seus estudos na educación secundaria xeral, mentres que case o 26 % optan pola formación profesional. Esta tendencia mantívose estable nos últimos anos, reflectindo a importancia da educación secundaria como un paso crucial na formación dos estudantes.

Normativa Educativa

O sistema educativo estoniano está regulado por diversas leis que garantizan os dereitos e deberes dos estudantes, pais e institucións educativas:

• Constitución da República de Estonia: Dereito á educación

• Lei de protección da infancia :Obrigas dos gobernos para garantir os dereitos dos nenos

• Lei de Educación (Eesti Vabariigi haridusseadus): Define os niveis educativos e a asistencia escolar obrigatoria.

• Lei de Escolas Básicas e de Educación Secundaria Superior ( Põhikooli- ja gümnaasiumiseadus): Establece as bases para a organización do estudo e os dereitos dos estudantes.

Imaxe autoeditada do patio central da escola  de Tallinna XXI Kool.

Conclusión

A educación en Estonia destaca pola súa estrutura ben definida e a atención aos valores fundamentais que promoven o desenvolvemento integral dos estudantes. A combinación de un currículo nacional sólido, a flexibilidade nas transicións educativas e a regulación legal contribúen ao éxito do sistema educativo estoniano, que serve como modelo a seguir para outros países. A experiencia adquirida durante a estadía permitirá un proceso analítico e reflexivo sobre as prácticas educativas que se poden aplicar en contextos diferentes.

Fonte; https://eurydice.eacea.ec.europa.eu/eurypedia/estonia/

Estudando as matemáticas en Turquía: mobilidade ERASMUS+

A nosa compañeira, Ángela López, tivo a oportunidade de visitar varios centros de Secundaria nunha cidade de Turquía, Mersin, para coñecer de primeira man o funcionamento do sistema educativo turco. 

A experiencia encádrase nunha mobilidade ERASMUS+ levada a cabo grazas ao CFR de Ferrol, quen seleccionou a varios profesores de Matemáticas da comarca de Ferrolterra para analizar as clases desta materia no país turco despois de mellorar os seus resultados no último informe das probas TIMSS.

Podedes ver un resumo da súa experiencia pinchando no seguinte enlace para acceder á presentación que nos fixo a modo de resumo. 

Erasmus+ en Grecia: a civilización helénica

                                                           ERASMUS + KA1 COURSE

HELLENIC CIVILIZATION. Wisdom combined with beauty

18 a 22 de novembro de 2024, Levadia, Grecia

O programa de Erasmus+ que tivo lugar en Grecia durante o día 18 a 22 de novembro de 2024 tiña como obxectivo achegar aos docentes á civilización helénica, milenaria cultura que destacou por impoñer as bases culturais da nosa sociedade actual.

O primeiro día, fóra da planificación, paseamos pola cidade de Atenas á nosa chegada, xa pasadas as once da noite. Non quixemos perder o espectáculo de ver a Acrópole iluminada que se albisca dende moitos lugares da inmensa urbe, capital do país. Ao día seguinte, acudimos a unha visita guiada e comemos moi preto do museo para, inmediatamente despois, partir cara Levadia, nun traxecto que nos levou aproximadamente dúas horas en bus.

Alí tivo lugar a formación, que deu comezo o luns cunha pequena presentación sobre o sistema de educación público de Grecia, para despois pasar a tratar cuestións de cidadanía e democracia inherentes á Antigüidade helénica. As leccións teóricas estiveron dirixidas por dous docentes gregos: Vasily e Popi, que deron boa mostra da tradicional hospitalidade grega e fixéronnos sentir totalmente acompañados durante a nosa estancia.

Ese mesmo día acudimos a visitar unha escola de Educación Primaria (4th Primary School of Levadia) onde, coincidindo co aniversario da Revolta da Universidade Politécnica, se celebrou unha representación teatral na que participaron varios cursos. Levaba por nome The Dictatorship e, a pesar de estar dramatizada en grego, observamos claramente a potencialidade do alumnado ante o seu público, recitando a maior parte dos diálogos de memoria e acompañados sempre con música e cantos dos seus compañeiros/as.

O martes 19 fomos de visita ao Santuario de Delfos onde un guía nos explicou as obras máis salientables que se custodian no Museo de Delfos e, posteriormente, nos fixo un recorrido polo inmenso xacemento arqueolóxico emprazado aos pés do Monte Parnaso.

Despois de comer nunha taberna típica a medio camiño entre Delfos e Levadia, pasamos a tarde facendo elementos de cerámica en torno, nun famoso taller de alfarería da cidade: o Krya Art Center.

O mércores 20 afondamos nos coñecementos sobre a música grega, dende a Antigüidade ata a actualidade. A explicación teórica, amenizada por fragmentos musicais de diferentes artistas, fixo especial fincapé nun estilo contemporáneo coñecido como Rebetiko, propio do século XX e nacido nas rúas de Atenas froito da migración e da marxinalidade. Así, seguindo con esa temática, visitamos a Escola de Música próxima á vila, onde puidemos deleitarnos cunha actuación espectacular do seu alumnado e de parte do profesorado, que nos recibiu amablemente e nos tocaron e cantaron con varias pezas diferentes, destacando as interpretacións do seu coro de estudantes.

Para rematar a xornada fixemos unha visita á cidade próxima de Antikyra, situada a carón do mar e moi turística durante os meses de verán. No restaurante Castello degustamos unha cea típica de produtos gregos procedentes do mar.

O xoves, tanto a sesión da mañá como a da tarde estivo destinada ao drama e ao teatro, unha actividade propiamente grega dende os albores da civilización. De tal xeito, a primeira parte foi unha explicación teórica sobre o drama na Antigüidade con especial atención ao autor Sófocles. Posteriormente, guiados por un gran experto, Lazaros Papadopoulos, puidemos realizar diversas actividades para coñecernos mellor como grupo e incitar á improvisación. Realizamos unha pequena obriña teatral improvisada en pequenos grupos que, posteriormente, tivemos que adaptar para representar mediante mímica e tan só cinco palabras. A idea enganchounos dende o primeiro momento e as improvisacións dos grupos foron incriblemente divertidas.

Por último, o venres 22 Popi explicounos as celebracións típicas dos gregos, ligadas en moitos casos a vacacións escolares. Falamos das diferenzas entre as festividades relixiosas católicas e ortodoxas, así como a súa influencia nas identidades culturais de ambos países. Posteriormente, fixéronnos entrega dos diplomas e partimos visitar un centro de educación secundaria coñecido como 3th High School Levadia. Alí un grupo de estudantes guiounos polas instalacións, onde puidemos entrar en distintas aulas materia e ver o desenvolvemento dalgunhas clases, como a de debuxo. Ademais, un gran grupo de alumnos e alumnas realizou unha actuación de danza típica grega, á que nos sumamos grazas a contar con pasos simples e moi rítmicos. Como contrapartida, improvisamos algúns pasos do baile galego por excelencia: a muiñeira guiados pola man de Fani, profesora de música en Educación Primaria.

Para rematar a xornada, os docentes do instituto ofrecéronnos unha comida feita por eles e que axudaron os estudantes a servir.

Con moita mágoa e un par de quilos de máis, o sábado 23 ás 8 da mañá, partimos de novo cara o aeroporto de Atenas para regresar a Ferrol e reincorporarnos a vindeira semana aos nosos respectivos centros.

IV FASE OBSERVA - ACCIÓN: INTERNALIZACIÓN (CROACIA)

 O CPI Plurilingüe Virxe da Cela forma parte do programa Observa_Acción. Nesta cuarta fase, tres mestres do centro tiveron a oportunidade de coñecer o sistema educativo croata.

No seguinte enlace poderedes ver un breve resumo. 

PRESENTACIÓN CROACIA